«Ուժեղ Հայաստան» կուսակցության առաջնորդ, ՀՀ վարչապետի թեկնածու Սամվել Կարապետյանը իր համակիրների հետ հանդիպման ժամանակ հայտարարել է, որ ներկայիս իրավիճակում գրեթե ողջ աշխարհը պայքարում է Հայաստանի Սյունիքի մարզի համար։
Նրա խոսքով՝ ներկայիս իշխանությունները Հայաստանը վերածել են աշխարհաքաղաքական պայքարի կենտրոնի։ «Մենք հանգիստ ապրում էինք մեզ համար, դա ոչ մեկին պետք չէր, բայց այն քայլերը, որոնք այսօր ձեռնարկվում են, ծայրահեղ վտանգավոր են։ Մի քայլ են անում՝ ռուսներն են դժգոհում, մեկ այլ քայլ են անում՝ ամերիկացիներն են արտահայտում իրենց դժգոհությունը, երրորդ քայլին՝ եվրոպացիներն են իրենց մասին հայտարարում»,- նշել է Սամվել Կարապետյանը՝ ընդգծելով Սյունիքի վերաբերյալ հստակ դիրքորոշում ունենալու կարևորությունը, որը, նրա կարծիքով, պետք է մնա հայկական։
Քաղաքական գործիչը վստահեցրել է, որ 2020 թվականից հետո ՀՀ վարչապետ Նիկոլ Փաշինյանը չի մասնակցում Հայաստանին վերաբերող որևէ որոշման։ Նա նաև հայտարարել է, որ գրեթե ամեն օր քննարկվում է այս կամ այն հողակտորը հանձնելու հարցը։ Ըստ նրա՝ անհասկանալի է, թե որ գծով է իրականացվում սահմանագծումն ու սահմանազատումը Հայաստանի և Ադրբեջանի միջև։
«Ինչո՞ւ պետք է մենք անընդհատ զիջենք։ Պարտվել եք՝ հեռացե՛ք, թող գան նրանք, ովքեր չեն պարտվել, ովքեր ունեն շատ ավելի մեծ հնարավորություններ, այդ թվում՝ միջազգային հնարավորություններ։ Դրա համար պետք է այս ամենը բացատրել մարդկանց, որպեսզի հունիսի 7-ին նրանք ճիշտ ընտրություն կատարեն»,- ասել է Սամվել Կարապետյանը՝ նշելով, որ իրեն իշխանություն է պահանջելու փոխարեն, նույնիսկ բանտում նստած ժամանակ ավելի շատ իշխանություն է ունեցել, քան ներկայիս իշխանությունները։
