Աշխարհի տարբեր երկրների հայտնի իրավապաշտպանների խումբը երրորդ տարին անընդմեջ ադրբեջանական գերության մեջ գտնվող հայ հումանիտար գործիչ Ռուբեն Վարդանյանին առաջադրել է 2026 թվականի Վացլավ Հավելի անվան մարդու իրավունքների մրցանակի։
Այս մասին հայտնի դարձավ իրավապաշտպանների կողմից տարածված հայտարարությունից, որում նշվում է, որ առաջադրումը նպատակ ունի ընդգծելու Ռուբենի զգալի ավանդը ողջ աշխարհում մարդու իրավունքների պաշտպանության գործում՝ «Ավրորա» մարդասիրական նախաձեռնության միջոցով, ինչպես նաև նրա անսասան հավատարմությունը Լեռնային Ղարաբաղում (Արցախում) իր հայրենակիցների իրավունքների պաշտպանությանը։
Հայտարարության մեջ նշվում է, որ «Ավրորա» մրցանակը, որը հիմնադրվել է Ռուբեն Վարդանյանի, Նուբար Աֆեյանի և Վարդան Գրեգորյանի կողմից, ոգեշնչել է դրա դափնեկիրներին շարունակել իրենց կենսականորեն կարևոր աշխատանքը՝ փրկելով հազարավոր մարդկանց կյանքեր տարբեր երկրներում։
Իրավապաշտպանները նաև ընդգծում են, որ Ռուբեն Վարդանյանի համոզմունքներն ու աջակցությունը հնարավորություն են տվել կյանքի ծանր հանգամանքներում հայտնված բազմաթիվ մարդկանց պաշտպանելու իրենց իրավունքները։ Նրա որոշումը՝ 2020 թվականի սեպտեմբերին տեղափոխվելու Լեռնային Ղարաբաղ՝ իր հայրենակիցների կողքին կանգնելու համար, նկարագրվում է որպես խաղաղարարի և մարդասիրական գործչի բնույթի խորհրդանիշ։
Առաջադրող խմբի անդամներն են՝ գրող և մարդկանց առևտրի դեմ պայքարող Վահան Զանոյանը, բուրունդիացի իրավապաշտպան Մարգարիտ Բարանկիցեն, ամերիկացի բժիշկ և հումանիտար գործիչ Թոմ Քաթենան, կոնգոյացի իրավապաշտպան Ջուլիեն Լուսենգեն և այլք։
Այս առաջադրումը կատարվում այն պայմաններում, երբ Ռուբեն Վարդանյանը, ինչպես նաև Արցախի ռազմաքաղաքական ղեկավարության այլ ներկայացուցիչներ՝ Արկադի Ղուկասյանը, Բակո Սահակյանը, Արայիկ Հարությունյանը, Դավիթ Բաբայանը, Դավիթ Իշխանյանը, Լևոն Մնացականյանը և Դավիթ Մանուկյանը, ադրբեջանական ռազմական դատարանի կողմից ապօրինաբար դատապարտվել են ցմահ ազատազրկման կամ մինչև 20 տարվա ազատազրկման։
Իրավապաշտպանները հավատում են, որ 2026 թվականին Ռուբեն Վարդանյանին մրցանակի շնորհումը կլինի նրա բացառիկ ջանքերի արժանի ճանաչումը և կարևոր քայլ կդառնա անձամբ նրա և Բաքվում գտնվող մյուս հայ բանտարկյալների ազատ արձակման ճանապարհին։
