Հայաստանի փոխվարչապետ Մհեր Գրիգորյանը հանդիպել է ԱՄՆ պետքարտուղարության Տնտեսության, էներգետիկայի և բիզնեսի հարցերով բյուրոյի ավագ խորհրդական դեսպան Էն Մարի Յաստիշոկի ղեկավարած պատվիրակության հետ՝ քննարկելու «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի իրականացման հաջորդ քայլերը։
Հանդիպման ընթացքում կողմերը նշել են 2025 թվականի օգոստոսի 8-ին Վաշինգտոնում տեղի ունեցած խաղաղության գագաթնաժողովի առանցքային պայմանավորվածություններից մեկի՝ ԹՐԻՓՓ-ի հետ կապված գործառնական և իրավական հարցերի շուրջ եղած զգալի առաջընթացը։
Փոխվարչապետ Գրիգորյանը ներկայացրել է Հայաստանի «Խաղաղության խաչմերուկ» նախաձեռնությունը՝ ընդգծելով տարածաշրջանային հաղորդակցությունների բացման և փոխկապակցվածության ներուժը։
Հիշեցնենք, որ ԹՐԻՓՓ նախագիծը, որի մասին հայտարարություն է կատարվել հունվարի 14-ին, նախատեսում է Հայաստանի տարածքով տրանսպորտային միջանցքի ստեղծում, որը կկապի Ադրբեջանն իր նախիջեւանյան էքսկլավի հետ։ Համատեղ հայտարարության համաձայն՝ Հայաստանը մտադիր է թույլատրել և աջակցել ԹՐԻՓՓ զարգացման ընկերության հիմնմանը, որը կառավարվելու է 49 տարվա կառուցապատման իրավունքով։ Ընկերության բաժնետոմսերի փոփոխությունները կներառեն Հայաստանի և ԱՄՆ կառավարությունների համաձայնեցումը։
